Mangalusi sungkunsungkun ni angka dongan taringot tu umpasa
sidohonon hatiha mangulosi di ulaon unjuk dison pinaandar pigapiga
umpasa na boi pillitonta sian pengalaman ni panurat tarlumobi ma i sian
panuturion ni angka natuatua.
Menjawab pertanyaan dai beberapa teman perihal umpasa ketika
menyampaikan ulos kepada pengantin pada pesta adat pernikahan, berikut
kami rangkum beberapa pilihan (seri 1) berdasarkan pengalaman dan
pencerahan dari para orangtua.
Hula-hula / Tulang Pasahat Ulos tu pengantin (Seri 1)
Dakka ni arirang, peak di tonga onan,
Badan muna naso jadi sirang, tondi mu marsigomgoman
Giring-giring ma tu gosta-gosta, tu boras ni sikkoru,Sai tibu ma hamu mangiring-iring, huhut mangompa-ompa anak dohot boru.
Rimbur ni Pakkat tu rimbur ni Hotang,
Sai tudia pe hamu mangalakka, sai tusima hamu dapot pansamotan.
Sai tudia pe hamu mangalakka, sai tusima hamu dapot pansamotan.
Dekke ni sale-sale, dengke ni Simamora,
Tamba ni nagabe, sai tibu ma hamu mamora.
Tamba ni nagabe, sai tibu ma hamu mamora.
Sahat-sahat ni solu, sahat ma tu labuan,
Sahat ma hamu leleng mangolu, jala sai di dongani Tuhan.
Sahat ma hamu leleng mangolu, jala sai di dongani Tuhan.
Hula-hula / Tulang Pasahat Ulos tu pengantin (Seri 2)
Anian ma pagabe tumundalhon sitodoan,
Arimu ma gabe molo marsipaolo-oloan.
Arimu ma gabe molo marsipaolo-oloan.
Ruma ijuk tu ruma gorga,
Sai tubu ma anakmuna na bisuk dohot borumuna na lambok marroha
Sai tubu ma anakmuna na bisuk dohot borumuna na lambok marroha
Sahat solu, sahat di parbinsar ni ari,
Leleng ma hamu mangolu jala di iring-iring Tuhan ganup ari.
Leleng ma hamu mangolu jala di iring-iring Tuhan ganup ari.
Hula-hula / Tulang Pasahat Ulos tu pengantin (Seri 3)
Asa ni assisbang, jonok tu pargongonan
Badan mu na sora sirang, tondi mu marsigomgoman
Tangki jala hualang, garinggang jala garege.
Tubuan anak ma hamu, partahi jala ulubalang,Tubuan boru par-mas jala pareme.
Bona ni pinasa, hasakkotan ni jomuran,
Tung aha pe dijama hamu, tongtong ma i habaoran pasu-pasu ni Tuhan.
Tung aha pe dijama hamu, tongtong ma i habaoran pasu-pasu ni Tuhan.
Mandurung di aek Sihoru-horu, manjala di aek Sigura-gura
Udur ma hamu jala leleng mangolu, hipas matua sonang sora mahua.
Udur ma hamu jala leleng mangolu, hipas matua sonang sora mahua.
Hula-hula / Tulang Pasahat Ulos tu pengantin (Seri 4)
Ai na tinapu salaon, salaon situa-tua,
Denggan ma hamu masianju-anjuan asa saut gabe jala saurmatua.
Martumbur ma baringin, mardangka ma hariara,
Matorop ma pomparanmu maribur, matangkang ma juara.
Tangkas pe jabu suhat, tangkasan do jabu bona.
Tangkas ma hamu maduma, tangkas ma nang mamora.
Tubuma halosi di dolok ni pintu batu
Hami Tulangmu mangulosi, Debata do ianggo na masu-masu.
Sahat-sahat ni solu ma sahat tu bontean,
Pasahaton nami ma ulos si ganjang rambu on Sahat ma hamu tu parhorasan, sahat tu panggaben.
Hula-hula / Tulang Pasahat Ulos tu pengantin (Seri 5)
Dangir-dangir ni batu ma hamu, pandakdahan ni simbora,
Gabe ma hamu jala saurmatua jala sai marsada ni roha.
Sai situbu laklak ma hamu situbu singkoru di dolok ni purbatua,
sai tubuan anak ma hamu tubuan boru, donganmuna sarimatua.
Dekke ni sale-sale, dengke ni Simamora,
Tamba ni nagabe, sai tibu ma hamu mamora.
Songgop ma anduhur titi, sangkot diparjenggaran.
Mangasi ma Amanta Debata, sai ro ma akka parsaulian.
Sahat solu sahat tu bontean, toho di rondang ni bulan
Hata pasu-pasu marrhite tangiang ni tulang, sai sudema di pasaut Tuhan.
Hula-hula / Tulang Pasahat Ulos tu pengantin (Seri 6)
Aek sibarabara, Duruna i tubuan tolong.
Tung aha pe muse na masa, Ndang boi mago ianggo holong.
Tung aha pe muse na masa, Ndang boi mago ianggo holong.
Ruma ijuk di jolo ni sopo gorga,
Asi ma roha ni amanta Debata. Sai dilehon ma di hamu, Anak na bisuk dohot boru na marroha
Asi ma roha ni amanta Debata. Sai dilehon ma di hamu, Anak na bisuk dohot boru na marroha
Mardakka Jabi-jabi, marbulung ia si Tulan
Pasu-pasu nami marhite tangiang sai sude mai dipasaut Tuhan.
Pasu-pasu nami marhite tangiang sai sude mai dipasaut Tuhan.
Hula-hula / Tulang Pasahat Ulos tu pengantin (Seri 8)
Dakka ni arirang, peak di tonga ni onan,
Badan muna naso jadi sirang, tondi mu marsigomgoman
Badan muna naso jadi sirang, tondi mu marsigomgoman
Simbora ma pulguk, pulguk di lage-lage,
Sai mora ma hita luhut, huhut horas jala gabe.
Sai mora ma hita luhut, huhut horas jala gabe.
Tingko ma inggir-inggir, Bulung nai rata-rata
Hata pasu-pasu i, Pasauthon ma namartua DEBATA
Hata pasu-pasu i, Pasauthon ma namartua DEBATA
Hula-hula / Tulang Pasahat Ulos tu pengantin (Seri 9)
Pirma toras ni pongki, Bahul-bahul pansalongan
Pirma tondi muna, Tutambana pangomoan
Pirma tondi muna, Tutambana pangomoan
Ruma ijuk tu ruma gorga,
Sai tubu ma anakmuna na bisuk dohot borumuna na lambok marroha.
Sai tubu ma anakmuna na bisuk dohot borumuna na lambok marroha.
Andor halumpang Togu-togu ni lombu, andor hatiti Togu-togu ni horbo
Penggeng saur matua ma hamu pairing-iring anak dohot boru Sahat tu namarnini sahat tu namarnono
Penggeng saur matua ma hamu pairing-iring anak dohot boru Sahat tu namarnini sahat tu namarnono
Tingko ma inggir-inggir, Bulung nai rata-rata
Hata pasu-pasu i, Pasauthon ma namartua DEBATA
Hata pasu-pasu i, Pasauthon ma namartua DEBATA
Hula-hula / Tulang Pasahat Ulos tu pengantin (Seri 10)
Martantan ma baringin, Mardangka hariara
Horasma tondi madingin, Matangkang ma manjuara
Horasma tondi madingin, Matangkang ma manjuara
Bintang ma narumiris, Tu ombun na sumorop
Anak pe antong riris, Jala boru pe antong torop
Anak pe antong riris, Jala boru pe antong torop
Dekke ni sale-sale, dengke ni Simamora,
Tamba ni nagabe, sai tibu ma hamu mamora.
Tamba ni nagabe, sai tibu ma hamu mamora.
Marmutik tabu-tabu mandompakhon mataniari,
Sai hot ma di hamu akka pasu-pasu, laho marhajophon akka na sinari.
Sai hot ma di hamu akka pasu-pasu, laho marhajophon akka na sinari.
Sahat-sahat ni solu, sahat ma tu labuan,
Sahat ma hamu leleng mangolu, jala sai di dongani Tuhan.
Sahat ma hamu leleng mangolu, jala sai di dongani Tuhan.
Hula-hula / Tulang Pasahat Ulos tu pengantin (Seri 11)
Balintang ma pagabe tumandakhon sitadoan,
Saut do hamu gabe asal ma tontong masipaolo-oloan.
Tubu ma hariara, di tonga-tonga ni huta
Sai tubu ma di hamu anak namarsahala dohot boru namora jala na martua
Sai tubu ma di hamu anak namarsahala dohot boru namora jala na martua
Eme sitamba tua ma, Parlimggoman ni siborok
Debata do na martua, Horas ma hamu di parorot
Debata do na martua, Horas ma hamu di parorot
Sahat solu, sahat di parbinsar ni ari,
Leleng ma hamu mangolu jala di iring-iring Tuhan ganup ari.
Songon i majolo na boi pinaandar.
Tangerang 3 Juni 2009, Tabe mardongan tangiang,
St. Sampe Sitorus/br Sitanggang (A.Hitado Managam Sitorus)
Dirangkum dan disusun dari berbagai sumber dan pengalaman serta ”panuturion ni natuatua”.
Silahkan di copy dan share, namun dimohon menyebutkan blog ini.
0 comments:
Posting Komentar